Busturialdeko Hitza

Putreen «ustezko erasoei» buruzko azalpenak eskatu ditu PPk

Gizartea Foru Aldundiari eskatu dizkio azalpenak, izan ere, hegaztiok hildako animaliengana besterik ez direla hurbiltzen deritzo.

ERREDAKZIOA

Alderdi Popularrak azalpenak eskatu dizkio Bizkaiko Foru Aldundiari putreek ganaduari egindako «ustezko erasoei» buruz. Animalia bizidunen kontra putreek egindako erasoei buruz Aldundiak zein datu dituen azaltzeko eskatu dio Arturo Ignacio Aldecoa Bizkaiko Batzar Nagusietako PPko Nekazaritza Batzordeko kideak Irene Pardo diputatuari.

PPren datuak

PPren arabera, «datu zientifikoek eta mendeetako esperientziak diote hegazti harrapakariak hilda edota kolapso baten edo gaizki ateratako erditze baten ondorioz mugiezinik dagoen ganaduarengana soilik hurbiltzen direla eta bizirik dauden animaliei erasotzeko ahalmenik ez dutela».

Aldecoak salatu du orain aste batzuk Kortezubin putreei egotzi zietela behi baten heriotza, «baina komunikabideetan emandako datuak kontrajarriak» izan direla. PPren arabera, «batzuek behia zaurituta eta botikak hartuta zegoela eta erditze zail bat izan berri zuela zioten; beste batzuetan, ordea, behia onik zegoela eta hegaztiek hil zutela zabaldu zuten».